Трипеснцы II недели по Пасхе

11 мая, 2021 Богослужение Комментарии : 0
Читали : 167

Источник: Богослужения Триоди Цветной. М., 2017. С. 706-724

Чтобы помочь нам не утратить радость о воскресении Христовом во дни от Пасхи до Троицы, Святая Церковь составила множество прекрасных молитвословий. В их числе — и трипеснцы авторства прп. Иосифа Песнописца, предназначенные для чтения на Повечериях в будние дни послепасхального периода.

В наши дни они никогда не звучат в приходском богослужении, и потому мы бы хотели предложить участникам нашего сообщества включить их в состав своего вечернего молитвенного правила: читать их на повечериях или же вместо некоторых молитв из правила, помещенного в молитвослове.

Насколько нам известно, в удобном для чтения виде этих трипеснцев в Сети ранее не было. Публикации с ними будут выходить еженедельно. К каждой статье мы прилагаем оглавление для удобства использования.

Оглавление

Ι. Вечер воскресенья II недели
2. Вечер понедельника II недели
3. Вечер вторника II недели
4. Вечер среды II недели
5. Вечер четверга II недели
6. Вечер пятницы II недели

Вечер воскресенья II недели

Песнь 1

Ирмос: Твоя победительная десница, боголепно в крепости прославися: та бо, Безсмертне, яко всемогущая, противныя сотре, Израильтяном путь глубины новосоделавшая.

Припев: Слава, Господи, святому Воскресению Твоему.

Воспоим Богу яко победителю, низложившему смертию смерть, и воскресившему с Собою род человеческий, и нетлением пребогатно почетшему.

Связан быв, смертныя узы яко Силен крепостию растерзал еси: разрешив же человеки от тли, из ада воскресил еси воспевающия державу Твою, Многомилостиве.

Слава: Благоутробне Христе, мене ради даже до ада бывый волею, лежаща мя в гробе греховном, и в рове преступлений, Твоим присещением воскресив помилуй.

И ныне, Богородичен: Видевши Христа от мертвых, Богородительнице, плотию воставша, радовалася еси: испроси же и мне радостотворный плач ныне даровати, яко да обрящу тогда, Чистая, божественное утешение.

Песнь 8

Ирмос: В пещи отроцы Израилевы, якоже в горниле, добротою благочестия чистее злата блещахуся, глаголюще: благословите, вся дела Господня, Господа, пойте и превозносите во вся веки.

Крестом Твоим разрешил еси клятву, положився во гробе, и адово мрачное, Христе мой Иисусе, низложив царство, и воскрес, всю тварь с Собою воскресил еси: темже Тя поем во вся веки.

Возшедшу Ти на Крест, солнце угасе, во ад же сошедшу Ти, Человеколюбче, свет возсия душам во тме сущим, и погребеным под горькою смертью: темже Тя поем во вся веки.

Слава: Связана мя пленицами греховными разреши, Христе, и осияй ми покаяния божественную светлость, Спасе, от тмы вечныя избавлей человеки, Твоим страшным востанием, еже воспеваем во вся веки.

И ныне, Богородичен: На руку носящая Христа, из Тебе воплощенна, Дево, Того моли прияти ныне и мене, безпутием всяцем жития и согрешеньми безчисленными заблуждшаго, сретающу ми нраву леностному всегда.

Песнь 9

ИрмосОбраз чистаго рождества Твоего огнепалимая купина показа неопальная, и ныне на нас напастей свирепеющую угасити молимся пещь: да Тя, Богородице, непрестанно величаем.

Видя солнце распинаема омрачися, посреде разбойнику Тя, Слове, Солнца незаходимаго: горы, холми, земля и море уклонишася; ад вострепета, юзники разрешая, яже держаше, воспевающия Тя.

Явился еси, якоже великое солнце, под землю зашед, возсиял же еси, незаходимое Светило, от мертвых, озарив преславно земныя концы: темже Тя, Животодавче, непрестанно величаем.

Спасе Иисусе, Твоею смертию смерть разоривый, воскресивый же вся тамо держимыя, воскреси и мене, в рове преисподнем страстей смертоносных и грехов суща — зову Ти, Человеколюбче.

Слава: Приидоша Мироносицы, плачуще, на гроб рано, и не обретше Тя, видеша в белых ризах председяща Ангела и вопиюща: воста Господь, спешите возвестити востание учеником Его.

И ныне, Богородичен: Дивится вся тварь, Владычице, еже паче ума таинству рождества Твоего: раждаеши бо Бога Еммануила, бывша нас ради человека, Всенепорочная, и разрушившаго смерти мучительства Крестом Своим.

Вечер понедельника II недели

Песнь 2

ИрмосВидите, видите, яко Бог Аз есмь, порабощеныя люди Израилевы Моисею народоводити в пустыни повелевый, и спасый яко Силен властию Моею.

Поим днесь Господеви, восклицающе распеншемуся нас ради, и низложившему злоначальнаго врага, и положшемуся во гробе и оживившему мертвыя воскресением Своим.

Свят Господь, из мертвых тридневно воскресый яко силен, учеником явлейся боголепно, и радости неизглаголанныя сих исполнивый души, скорби исполненныя прежде.

Слава: Слове собезначальне, Отцу Безначальну сопрестольне, распныйся и вменивыйся в мертвых, и воскресый яко Силен, мою душу оживотвори умерщвленую преступленьми.

И ныне, Богородичен: О, чудес Твоих! о, страшнаго слышания! Раждаеши бо плотию Бога, разоршаго смертныя узы, и от тли человеки изменшаго, Чистая Богоблагодатная.

Песнь 8

ИрмосЕгоже ужасаются Ангели, и вся воинства яко Творца и Господа, пойте, священницы, прославите, отроцы, благословите, людие, и превозносите во вся веки.

Рыдает вся тварь о Твоей страсти, Блаже, солнце померче, Тебе зашедшу на Кресте; и во тме седящии великий свет видеша, поюще Тя, Щедре.

Вострепета ад, Тя видев с душею к нему идуща, Христе Всецарю, и яже от века мертвыя издаваше, воспевающия Твое человеколюбие.

Слава: Явился еси, Христе, от гроба востав, принесшим ароматы божественным женам, и сих рыдание претворил еси, Утешение всех сый во веки.

И ныне, Богородичен: Видевши, Егоже родила еси Бога, из мертвых воставша, радости явилася еси исполнена, Дево Марие: того убо моли, Чистая, всякую печаль нашего сердца до конца потребити.

Песнь 9

ИрмосСветоносный облак, воньже всех Владыка, яко дождь с небесе на руно сниде и воплотися нас ради, быв Человек, Безначальный: величаем вси яко Матерь Бога нашего Чистую.

Яко виде Тя на Древе волею распята благоразумный разбойник «помяни мя, — вопияше, — егда приидеши, Иисусе, во Царствии Твоем», и бысть раеви житель, верою единою оправдався.

Тя, Спасе, видев в мертвых, ад умертвися, и издаваше мертвецы, яже пожре древле, славословящия, Христе, Твою неизглаголанную силу, и многое благосердие, имже спасл еси нас, Всецарю.

Слава: Приидоша носящия мира на гроб жены, и видевше Тя, Христе, воставша из гроба, радости исполнишася многия, и Апостолом Твоим возвестиша, яко воскресл и явился еси, совозставль мир весь с Собою.

И ныне, Богородичен: Свет невечерний, просиявший из мертвых, видевши, Чистая, и радости исполнившися многия, радовалася еси с пресвятыми ученики, с нимиже и нам испроси прощение безмерных прегрешений, Богородице, Заступнице верных.

Вечер вторника II недели

Песнь 3

ИрмосПрежде век от Отца рожденному нетленно Сыну, и в последняя от Девы воплощенному безсеменно, Христу богу возопиим: вознесый рог наш, свят еси господи.

Святе святых, освятити мир хотя, волею на Древо крестное вознеслся, и заклался еси яко агнец, и Кровию благодательною обновляеши нас, песнословящих Тя.

Крепость отъятся вражия, пленена бысть смерть, обезсмертися человеческое истлевшее существо, Христе Иисусе, умертвившуся Тебе, и обновися мир вопия: свят еси, Господи.

Слава: Ныне не удивляйтеся, — женам вопияше Ангел, — идите же паче усердно, учеником скорбящим радости глаголы возвещающе, яко воста Христос, Живот всех и Воскресение.

И ныне, Богородичен: Явилася еси ты, Дево Чистая, вышши Ангел, Бога воплощши распеншагося, и погребена, и мертвым нетление источившаго: Егоже моли спасти нас песнословящих Тя.

Песнь 8

ИрмосЧуда преестественнаго росодательная изобрази пещь образ: не бо, яже прият палит юныя, яко ниже огнь Божества — Девы, в Нюже вниде, утробу. Тем, воспевающе, воспоем: да благословит тварь вся Господа, и превозносит во вся веки.

Смерть волею приял еси, возвышаемь плотию на Древо, и зря Тя, солнце угасе, и церковная завеса раздрася, Всесильне. Темже, воспевающе Тя, зовем: да благословит тварь вся Господа, и превозносит Его во веки.

Видеша Тя, незаходимое Сияние, древле седящии в сени смертней, в нихже Тебе Господи, сошедшу с душею, и уз вечных разрешишася, вельми поюще Тя, и глаголюще: да благословит тварь вся Господа и превозносит его во веки.

Слава: Заутра ко гробу пришедше жены, блистающася Ангела видеша и глаголюща: Воскресе Избавитель! Что Живаго с мертвыми еще помышляете? Исполншеся радости возопийте: да благословит тварь вся Господа, и превозносит Его во веки.

И ныне, Богородичен: Умерщвление аду содела Сын Твой, Чистая, якоже прежде рече, из мертвых востав, Егоже моли тлетворнаго греха избавитися и муки, всем верою взывающим: да благословит тварь вся Господа, и превозносит Его во веки.

Песнь 9

ИрмосТаинство странное вижу и преславное: небо — вертеп, престол Херувимский — Деву, ясли — вместилище, в нихже возлеже невместимый Христос Бог, Егоже воспевающе величаем.

Исцеляя первозданнаго болезни, поболел еси висимь, Спасе, волею на Древе: положив же Ся в рове преисподнем, воскресил еси мертвыя, яже смерть возможе первее поглотити.

Яко виде Тя древле лик апостольский воскресша, Господи, страхом же и радостию покланяшеся. К нимже возопил еси: се сбытие глаголом Моим; не скорбите вы, но радуйтеся!

Плащаницею Тя, Спасе, обвив, положи Иосиф праведный любовию в новем гробе; врата же адова яве и вереи сокрушь, воздвигл еси мертвыя, яже смерть возможе прежде поглотити.

Слава: Радовахуся Мироносицы, слышавше Христово востание; темже Апостолом вопияху: текше спешно, се уже не скорбите, но радуйтеся вы: воста бо из мертвых всех Господь.

И ныне, Богородичен: Светящася всего в доброте без сосуждения, яко жениха, Христа видевши, Отроковице, из гробнаго чертога плотию произшедша, радости исполнилася еси, Егоже моли нас избавити тли и мучения.

Вечер среды II недели

Песнь 4

ИрмосНа божественней стражи богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос, яко Всесилен.

О нас смиренных веден был еси на смерть, Христе всех Животе, и пленив адова царствия, души, яко овцы, исхитил еси, с Собою воскресив, яко Царь державный и всесильный.

С мертвыми что Жизнь ищете? — явлейся женам, блистаяйся на гробе Ангел рече. — Воста. Приидите видите лежащя погребальная едина, и Его учеником возвестити потщитеся.

Слава: Мертв ад быв сошествием Христовым, всех мертвых отдаяше всяко пленяемь, и до конца испраздняемо сего чрево всеядное, всесильною волею Бога, всех Царя.

И ныне, Богородичен: Яко в краснейший храм, вселися в Тя, Чистая Дево, Иисус, всех Царь: снитием адово жилище мрачное упраздни, и воскресе, совоскресив человеки, яко Всесилен.

Песнь 8

ИрмосСей нареченный и святый день, един суббот царь и господь, праздников праздник, и торжество есть торжеств, воньже благословим Христа в веки.

Слава Христу врага низложившему, и пленившему ада еже к нему снитием, и яже возможе поглотити, оживившему мертвыя, песнословящия Его во веки.

Се, — женам Мироносицам вопияше явлейся Ангел блистаяйся, — место, в немже положися, видевше убо смерть и ад Пленившаго силою Своею, не ктому в мертвых Жизни ищите.

Слава: Ад огорчися, доле срет Тя, Слове, не могий Тебе приближитися, и яже поглоти мертвыя, скоро отдаяше повелением Твоим, песнословящия согласно державу Твою.

И ныне, Богородичен: Видела еси из мертвых воставша, Дево, Егоже плотию неизреченно родила еси Слова, и радости душу исполнила еси, Его снитие песнословящи, Чистая, во вся веки.

Песнь 9

ИрмосСветися, светися, Новый Иерусалиме: слава бо Господня на Тебе возсия: ликуй ныне и веселися, Сионе. Ты же, Чистая, красуйся, Богородице, о востании Рождества Твоего.

Часов же и дней Содетель сый, Избавителю, в день и час шестый, волею поносное претерпел еси Распятие, Щедре, яко да наша утолиши поношения и примириши нас Отцу.

Стеня ад усрет Тя, Избавителю, и яже имеяше юзники со скоростию отреши, божественными гласы воспевающия Твою, Слове, еже паче ума силу и страшное снизхождение.

Слава: Приидоша с миром жены, утру глубоку, со тщанием, еже помазати тело пречистое, и к ним Безплотный рече: Начальник живота воста, радости божественныя исполнитися.

И ныне, Богородичен: Свет родившая, возсиявший седящим во тме и сени смертней, яко видела еси, Пренепорочная, возсиявша из мертвых, с женами всеми Мироносицами, славословясте его ликующе.

Вечер четверга II недели

Песнь 5

Ирмос: Светлый нам возсияй свет присносущный, утренюющим о судьбах заповедей Твоих, Владыко Человеколюбче, Христе Боже наш.

Собор еврейский Тебе долготерпеливаго, Слове, распят; сонм же безчисленный языков всех Твоим распятием спасл еси, Человеколюбче Христе Боже наш.

Не поколебал еси камене знамения воскресением Твоим, якоже ни отверзл еси в рождестве Твоем девства ключей Рождшия Тя, Христе Боже наш.

Слава: Странным образом видевше божественно блистающася Безплотнаго, жены ужасни бывше, слышаху: не плачите, воскресе Господь!

И ныне, Богородичен: Свята Господа сил, Пречистая, родила еси, истощившаго адова царствия, и воскресша, и совоскресившаго человеческое смешение.

Песнь 8

ИрмосПеснословцы в пещи спасшаго дети, и громопламенную преложшаго на росу, Христа Бога пойте, и превозносите Его во вся веки.

Волею распеншагося, и положшагося во гробе, и упразднившаго смерти державу, Христа Бога пойте, и превозносите Его во веки.

Явился еси первее женам, востав из гроба, и благовестницы послав их Апостолом, Христе: темже Тя хвалословим во вся веки.

Разрушив, Щедре, крепостию смерти силу, и адова царствия, яко сый Царь, истощил еси: темже Тя хвалословим во вся веки.

Слава: Рекл еси учеником, востав: во всем мире проповедати потщитеся Мою силу, изымающе тму многобожия светом истинным.

И ныне, Богородичен: Яко Небес вышшая, и Херувимов лучшая, честнейшая же, Всесвятая Дево, твари всея, молися о верою присно Тя славящих.

Песнь 9

ИрмосЖивоприемный Источник приснотекущий, светоносный Светильник благодати, Храм одушевленный, Сень пречистую, Небесе и земли пространнейшую, Богородицу вернии величаем.

Радуется земля вся днесь, и веселие облацы да кропят: на Древе бо Господь славы распныйся, воста, тли смертныя нас свободив и нетлением просветив, яко Благоутробен.

Миро иногда носящим со слезами священным женам отвещаваше Ангел, блистаяйся светло на гробе: с мертвыми Живаго почто ищете? Сей воскресе, просветив всяческая.

Слава: Светозарное Бога нашего востание, паче солнечных зарей освещающее духом верныя, во веки вся просвещает и наставляет ко спасению: еже чистою мыслию празднуем.

И ныне, Богородичен: Умерщвленных нас грехопаденьми, Живот вечный родившая, Богородице, оживи, и творити поспеши, к животу истинному наставляющи: яко да верою Тя присно ублажаем.

Вечер пятницы II недели

Песнь 6

ИрмосОбыде нас последняя бездна, несть избавляяй, вменихомся, яко овцы заколения. Спаси люди Твоя, Боже наш: Ты бо — Крепость немощствующих, и Исправление.

Пригвоздиша Тя на кресте беззаконнии Евреи, Долготерпеливаго; ихже дерзость солнце зря и луна, абие свет скрыша, и мертвии, воставше, Тя, Христе, воспеваху.

Да точат горы сладость днесь, и людие да радуются: воскресе бо тридневно Христос, разрешь смертныя болезни. Темже Тому, вернии, согласно вси хвалу принесем.

Слава: Яко утреневаша, Христе, на гроб Твой жены богомудрыя, видеша Ангела, возвещающа им Твое светоносное воскресение, и возгласи: миро Живому что ныне приношаете?

И ныне, Богородичен: Ложесна Твоя, Чистая, не вредив родися, якоже благоволи, не разрешь печати гроба, и воскресе, якоже восхоте: вся бо благая Творит, яко Животодавец и Всесилен.

Песнь 7

ИрмосТебе умную, Богородице, пещь, разсмотряем вернии: якоже бо отроки спасе три Превозносимый, мир обнови во чреве Твоем всецел, хвальный отцев Бог и препрославлен.

Распныйся, Владыко, со двема разбойникома, и оцта напоен быв, и заушение подъем нас ради, Долготерпеливе, волею вся претерпел, и воскресл еси тридневно, прехвальный отцев Бог и препрославлен.

Мертволепно Иосиф снем от Древа, и погребению предав любезно, тело Твое пречистое любовию облобызаше, и радуяся вопияше Ти: прехвальный отец наших Боже, благословен еси.

Слава: С мертвыми Живаго что ищете? — глаголаше явлейся Ангел плачущимся женам. — Что миро приношаете? Но шедше, учеником Его рцыте: умертвивыйся воста Христос, не ктому крыйтеся.

И ныне, Богородичен: В женах едина Благодатная: Подателя бо радости Архангеловым гласом радостно родила еси. Темже Тя чтим, и Сыну Твоему зовем: прехвальный отец наших Боже, благословен еси.

Песнь 8

ИрмосВ пещи отроцы Израилевы, якоже в горниле, добротою благочестия чистее злата блещахуся, глаголюще: благословите, вся дела Господня, Господа, пойте и превозносите во вся веки.

Людие Тя прежде непокоривии Евреи емлют, и завистию возносят на крест неистовно, не хотяще пети Тебе: благословите, вся дела Господня, Господа, пойте и превозносите его во веки.

Облобызаше любовию Иосиф, тело испросив, и во гробе полагает яко мертвое: Той же сокрушил есть смерти вся ключи, вереи же и врата, и тридневно воскресл есть.

Слава: Яко сый Миро мысленное, зело рано прииде помазати тело Твое женский лик, и обретоша Ангела вопиюща к ним: вся дела Господня, Господа пойте и превозносите его во веки.

И ныне, Богородичен: Непреложна родила еси Сына Божественнаго существа, Марие благословенная, аще и явися нас ради плотию, якоже благоизволи, Емуже вопием: вся дела Господня, Господа пойте, и превозносите Его во веки.

Песнь 9

ИрмосОбраз чистаго рождества Твоего, огнепалимая купина показа неопальная; и ныне на нас напастей свирепеющую угасити молимся пещь, да Тя, Богородице, непрестанно величаем.

Стал еси, Владыко, на Древе крестнем, и вся языки к разуму привлекл еси, Господи, и рай отверзл еси, егоже затвориша прежде праотцы вкушением древа: темже Тя вси величаем.

В рове яко смертна положиша Тя, жизни Подателя и Строителя, и гробная, Христе, вся благообразный Иосиф и Никодим, и женский собор с ними опрятав, жалостно рыдающе, боголепно Тя величаху.

Слава: Весь просвещение и желание, весь, Спасе мой, утешение и утверждение всем был еси, благочестно празднующим святое и тридневное востание Твое, едине Щедре: егоже ради Тя вси величаем.

И ныне, Богородичен: Плоть от Твоих, Всенепорочная, ложесн, волею восприят Всесовершенный, разумную поистинне и одушевленную, и посаждается Отеческим наследием, Пречистая, в Небесных, отонудуже и паки приидет.

УжасноОчень плохоПлохоНормальноХорошоОтличноВеликолепно (Пока оценок нет)
Загрузка...

Автор публикации

не в сети 2 недели

Редакция

Редакция 0
Комментарии: 3Публикации: 134Регистрация: 30-10-2016

Оставить комментарий

Для отправки комментария вам необходимо .