Молитвы и молитвенные размышления свт. Димитрия Ростовского пред Св. Причащением

Источник: Димитрий Ростовский, свт. О Причащении Св. Таин // Сочинения. М., 1839. Т. 1. С. 267-274

Ко дню памяти свт. Димитрия Ростовского, замечательного агиографа, пастыря и защитника канонического Православия, сообщество «Ἀλήθεια» публикует собрание его молитв и молитвенных размышлений ко Св. Причащению. Та сердечная теплота и искренность, с которой святитель обращается ко Христу в этих молитвословиях, мы надеемся, поможет и нам хоть сколько-то преодолеть порой овладевающее нами «окамененное нечувствие» и со страхом Божиим, верою и любовью, как подобает, приступить к Телу и Крови нашего Спасителя.

Молитвы свт. Димитрия использовались прп. игуменией Арсенией (Себряковой), их употребление благословлял своим духовным чадам и прп. Назарий (Валаамский). Мы полагаем возможным присоединить их к обычным молитвословиям ко Святому Причащению (а последнюю из приведенных ниже молитв — к молитвам благодарственным).

Размышление I

Да достойне убо причастишися, положи во уме разсуждение сицевое, к Богу мыслию глаголя:

Недостоин есмь, Господи, не точию причаститися Святых Твоих таин, но ниже воззрети на предивную и сверхъестественную Твою Трапезу. Обаче приступаю, не яко преобидя, но на неизреченную твою милость уповая дерзаю. Вем бо, яко не ради праведных, но ради грешных пришел еси.

Дерзаю причаститися, да не когда удален буду Причастия Твоего и снеден буду от мысленного волка.

Дерзаю приступати ко Причащению, надеющися на премилостивыя словеса Твоя, Господи, яже пречистыми Устны Твоими изрекл еси, глаголющи: «Сей есть хлеб сходяй с небесе, да, аще кто от него яст, не умрет: аз есмь хлеб животный, сшедый с небесе: аще кто снест от хлеба сего, жив будет». И паки: «Аминь, аминь глаголю вам: аще не снесте Плоти Сына Человеческаго, ни пиете Крове Его, живота не имате в себе. Ядый Мою Плоть и пияй Мою Кровь имать живот вечный, и Аз воскрешу его в последний день» (Ин. 6:50-51, 53-54).

На сия словеса Твоя, Господи, надеющися и несумненно уповающи, причащаюся, ведый известно, яко сия вся не тако ко святым и праведным, яко ко грешником и неоправданным изрекл еси. Начало, еже ко Причащению, Евангелия, не чтется «Рече Господь Своим учеником», иже бяху святыи и праведнии, но «Рече Господь ко пришедшим к Нему иудеом», иже бяху подобнии мне грешники. А понеже ко грешником сия изрекл еси, то и аз грешный сих послушаю усердно, и на твое превеликое милосердие возложився, ям Тело Твое и пию Кровь Твою.

Размышление II

Рассуждение Божественнаго Причащения, ибо не разсуждаяй суд себе яст и пиет.

Господь мой и Бог мой в пречистых Тайнах есть исцеление мое, аз же – больный; Господь есть здравие мое, аз же – сокрушенный и расслабленный; Господь есть очищение мое, аз же – прокаженный; Господь есть живот мой, аз же – мертв; Господь есть пастырь мой, аз же – заблудшая овца Его; Господь есть оправдание мое, аз же – осужденный; Господь есть взыскуяй меня, аз же – погибший.

Приступаю убо, яко больной к целителю, да исцелюся; яко сокрушенный и расслабленный ко врачу, да уврачеван буду; яко прокаженный ко очистителю моему, да очищуся; яко мертв к животу моему, да воскресну и оживу от смерти греховныя в добродетель.

Приступаю, яко овца к пастырю моему, да цел буду от волка; яко падый к восставляющему, да более не падаю; яко осужденный к судии моему, да из неправедного праведным мя сотворит Своим благоутробием. Приступаю, яко погибший к ищущему мя человеколюбцу, да всегда с Ним и в Нем пребуду; Он же со мною и во мне; да не ктому живу себе, но Ему, владыце моему и благодетелю; отселе да не ктому живу аз, но да живет во мне Христос (Гал. 2:20).

Приемлю пречистыя Тайны, да, от причащения их стяжавши помощь, отныне положу начало спасения моего, еже ктому не работати греху, но поработати, по силе моей, Богови моему, Его же поспешеством и укреплением верую всесильной Твоей помощи и благости, Господи Боже мой! «Верую, помози моему неверию» (Мк. 9:24).

Размышление III

Рассуждение другое, на отчаяние врачевство.

Что суть грехи моя противу милосердия Твоего Господи? Суть паучина противу ветра велика, блато мало противу реки великия, тьма противу солнца всесильнаго.

Повеет ветр зельный, преторгнет паучину; потечет река, омыет благо; возсияет солнце, проженет тьму.

Сице милосердие Твое превеликое, Боже! Яко ветр — паучину растерзает грехи моя; яко река — блато, омывает беззакония моя; яко солнце — тьму, просвещает мя и отгоняет злая дела моя, словеса и помышления.

Твоя же десница возвращающегося мя, яко блуднаго сына, отеческим объятием приемлет.

Почто убо сомневаюся? Не усумнюся убо о благости Твоей, ни отчаюся, о Господи мой! Милости Твоея не отчаюся никогдаже. О сем Тя Бога всесильна и крепка вем, яко грехи мои и всего мира не преодолеют милосердия Твоего. Аще бы преодолели, то не бы был сей Бог крепок и всесилен.

Молитва I

Поклонение Пречистым Христовым Таинам.

Божество Христово! осiяй мя, помилуй мя. Душе Христова! милосердствуй о мне, спаси мя. Тело Христово! напитай мя, укрепи мя. Крове Христова! напой мя, освяти мя. Водо ребр Христовых! омый мя, очисти мя. Вольное ми страдание Христово и смерте! исцели мя, оживи мя. Кресте Христов! силою Твоею огради мя, оживи мя и осени над главою моею в день брани.

О пресладкий Иисусе! услади любовию Твоею сердце мое, и в язвах Твоих пресвятых сокрый мя. О прелюбезный Любителю мой! не отступи от мене, ниже мне попусти отлучитися от Тебе ни на малое время. О всесильный Избавителю мой! от враг моих избави мя.

О премилостивый живота моего Содержителю и Правителю! управи пути моя на спасение, в час же кончины моея посли ми добрые предстатели, и кротко душе моей грешной от окаяннаго ми тела разлучитися повели, от воздушных духов соблюди и на Страшном Суде Твоем десных части не лиши мя, да славлю Твое превеликое милосердие со всеми славящими Тя во веки, аминь.

Молитва II

Врата и заклепы сердца моего, «возмитеся, и внидет Царь славы» (Пс. 23:7).

Вниди, Свете мой, и просвети тьму мою. Вниди, Животе мой, и воскреси мертвость мою. Вниди, Врачу мой, и исцели язвы моя. Вниди, Огню Божественный, и попали терние грехов моих; разжги утробу мою и сердце мое пламенем любве Твоея. Вниди, Царю мой, и истреби греховное от мене царство; сядь на престоле сердца моего, и царствуй во мне. Ты един Царь мой и Господь.

Молитва благодарственная по Святом Причащении

Величие души моея, радование духа моего, сладосте сердца моего, сладчайший Иисусе, слава моя, возносящая главу мою! Буди со мною и во мне неразлучно выну, и мене всесильною Твоею десницею удержи с Тобою и в Тебе, да прилеплюся Тебе, Господеви моему, в един дух с Тобою, да в Тебе, и о Тебе, и Тобою будут вся помышления моя, словеса и деяния; без Тебе бо не могу творити ничесоже. Да не ктому себе живу, но Тебе, Владыце моему и Благодетелю, да вся чувства моя душевная и телесная не мне, но Тебе, Создателю моему работают, о Нем же живут и движутся; и вся силы моя душевныя и телесныя Тебе, Искупителеви моему, да служат, Имже и в Немже держатся; и все житие мое, до последняго издыхания, во славу Пресвятаго Имени Твоего, Боже мой, буди. Аминь.